你知唔知一條溫暖牌要整幾多個「幾日幾夜」？
《有咩幸福過收女朋友親手織既第一條頸巾？就係收第二條》
當你女朋友送第二條頸巾比你既時候，
如果你心諗：「 吓...又係送頸巾」既話......
不如咁，我同你先講下佢第一次織頸巾比你既過程會係點...
雖然只係一條新手既15針「烏冬粗冷」，但呢條係佢人生第一條織既頸巾。
由零學起既佢，首先要搵機會借啲意試探你口風，問你鍾意咩色。
然後厚住面皮咁搵身邊啲好姐妹求教，問完一輪.....佢都係覺得佢地織個啲太Common，佢想織條Just for you既，所以自己去書局搵參考書自學，結果，啲圖仲難理解過數學書上面個啲Function Graph。
堅持想你擁有一條溫暖牌既佢，膽粗粗咁去左屋企附近既一間冷鋪，先買一舊冷，唔係就咁求其買，而係要諗埋啲冷會唔會吉肉，夠唔夠暖，粗幼、顏色漸變定唔漸變......
好心既老闆娘見佢頭都大埋，就建議佢：「第一次織啊？鳥冬冷喇！」
佢仍然一臉茫然，老闆娘再同佢講：「我教你開針喇！」佢就金精火眼咁望住老闆娘幫佢織第一行既過程，牢牢咁記到實一實，一邊番屋企，一邊已經諗住你帶住頸巾個Sweet樣，滿意歡喜咁展開佢人生既第一次。
已經覺得好複雜？
知道佢開頭就要付出咁多，已經有少少想喊？
未算！
然後佢就小心翼翼咁帶住舊冷，拎住枝針日織夜織，坐車又織，上堂又係櫃筒底偷織，睇電視又織，講電話又織，三扒兩撥食幾啖飯洗完手又織....
間中仲要數下個行齊唔齊針，萬一唔好彩，Miss左一針，又要逐格逐格搵番邊度甩針...
然後呢個「呢咁hea」既Moment 你仲打黎，問佢：「BB，做緊咩啊？做咩唔覆我message既？」
佢就要即時魯芬急轉彎咁諗個借口，唔比你識穿，扮好眼訓要訓覺，頭都痛埋換黎既係你仲發脾氣怪佢冷落你，對佢冷淡，問佢係唔係識左第二個。
幾日後，當佢滿心歡喜以為織好左三份一，一睇之下，唔係一條頸巾...
而係一塊上闊下窄既底褲型冷布....佢忍痛一扯...睇住所花既心機一格格咁消失...
重新上路，結果捱左三個禮拜眼訓...終於趕得切係第一個紀念日送比你。
佢幫你戴起足足花左一個月時間織起既心血，而你都幫佢戴起頭先係旺中揀左15分鍾個條頸鏈。
呢個就係佢神聖既第一次。
咁好啦，既然咁煩，點解佢仲會織第二條呢？
因為佢見你明明好凍都唔肯戴，好似已經唔記得左條頸巾既存在，
佢開始懷疑自己.......係唔係條頸巾隻色你唔鍾意呢？
係唔係太吉肉或者起左毛粒呢？
佢再諗番啲「烏冬冷」，諗諗下連自己都覺得「條野」唔係好見得人...
結果，佢展開左第二次更艱苦既旅程，
決心要織一條你會覺得靚，肯日日戴出街既頸巾。
係邊度趺低就係邊度企番起身，佢番番去個間鋪頭，揀左一隻最襯你既Pattern，
但老闆娘認得佢係一位新手，好心咁同佢講：「妹妹仔，呢隻Pattern好煩架喎...」
但係佢咩都唔理，耳邊響起一句歌詞「沿途紅燈再紅 無人可擋我路」就同老闆娘話：「我要學！」，
然後佢就買左六舊100% Virgin Woof，唔會吉唔會敏感唔會起毛粒既BB冷，
開始織呢條一行60針既溫溫溫溫溫溫溫溫溫溫溫溫暖牌。
但係，原來今次真係難好多，要全神灌注，劇都唔可以煲，
因為每5針就要轉另一個針法，笑一笑甩左一針既話，就要成行重新織過。
今次呢條多針不特止，唔好唔記得啲冷仲要好幼，睇到佢眼都朦....
每下針既鬆緊又要一致.....又要剪好手指甲同啲倒刺，費事唔覺意勾住啲冷....
花既時間同心機係之前個條既N倍......
啊....未完未完，為左靚啲，今次仲要係尾度再加啲「穌穌」，
將條冷圍住塊硬卡紙一圈一圈圈幾百個圈，每個圈又要力度平圴，
又要數住幾多圈...又要擔心會唔夠冷...
但係幾傷神佢都唔怕，佢只係想換你一個幸福既笑容。
終於，佢又一次將花左三個月既心機，
重織左六次既心血，趕及係冬天完結前親手幫你戴上....
睇住條頸巾戴係你頸上面個刻......佢有啲眼濕濕....
織第一條頸巾佢都可能只係人做我又做，係例牌既浪漫。
但佢肯為你織第二條既話，呢個女朋友就真係值得你去珍惜。
所以...如果你仍然心諗：「吓...又係頸巾？」既話，
咁佢人生既織第三條頸巾就可能唔係織比你同佢既Little Angel，
而係另一位懂得欣賞佢既Mr. Right。
(喜歡的話，也like一like我的page，會有更多故事及散文呢。)
Fb: 莎比亞
IG: sapeiar
Search